1- آپ نے ایمان کے بارے میں پوچھا؟

انہوں نے فرمایا: ایمان سے مراد تصدیق ہے، یعنی بندہ اللہ تعالیٰ، اس کے فرشتوں، اس کتابوں پر جو اس نے نازل فرمائی ہیں، ان تمام رسولوں پر جنہیں اس نے مبعوث فرمایا ہے، اور آخرت کے دن کی تصدیق کرے۔

2 – اور آپ نے تصدیق کے بارے میں پوچھا؟

تصدیق یہ ہے کہ بندہ قرآن میں جن باتوں کی تصدیق کرتا ہے، ان کے مطابق عمل کرے، اور اگر اس سے قرآن کی کسی بات پر عمل کرنے میں کوتاہی ہو جائے یا وہ اس میں تقصیر کرے تو اسے معلوم ہو کہ یہ گناہ ہے، پھر اللہ تعالیٰ سے اس کی مغفرت طلب کرے، اس سے توبہ کرے اور اس گناہ پر اصرار نہ کرے؛ پس یہی تصدیق ہے۔

(اکثر سلف اور ائمہ اہلِ سنت ایمان کی لغوی معنی کے اعتبار سے تفسیر کرتے ہوئے کہتے ہیں کہ ایمان تصدیق ہے۔ ان کا مقصود وہ معنی نہیں جو مرجئہ اپنے مختلف فرقوں اور گمراہ مذاہب کے مطابق بیان کرتے ہیں کہ ایمان محض ایسی تصدیق کا نام ہے جس کے ساتھ عمل شامل نہ ہو، بلکہ ان کی مراد ایسی اذعانی تصدیق ہے جو ظاہر و باطن کے عمل کو لازم کرتی ہے، جیسا کہ سیدنا سعید بن جبیر رحمہ اللہ نے یہاں فرمایا:   تصدیق یہ ہے کہ بندہ قرآن میں جن باتوں کی تصدیق کرتا ہے، ان کے مطابق عمل کرے۔۔۔

اور اسی طرح امام اوزاعی رحمہ اللہ نے بھی، جیسا کہ آگے ان کے عقیدے میں آئے گا، فرمایا:   دین تصدیق ہے، اور یہی ایمان اور عمل ہے۔ )

3 – اور آپ نے دین کے بارے میں پوچھا؟

دین سے مراد عبادت ہے، کیونکہ آپ کسی بھی اہلِ دین شخص کو ایسا نہیں پائیں گے کہ وہ اپنے دین والوں کی عبادت کو چھوڑ دے، پھر کسی دوسرے دین میں بھی داخل نہ ہو، مگر یہ کہ وہ بے دین ہو جائے۔

4 – اور آپ نے عبادت کے بارے میں پوچھا؟

عبادت سے مراد اطاعت ہے، اور یہ اس طرح ہے کہ جو شخص اللہ تعالیٰ کے ان تمام احکام میں اس کی اطاعت کرے جن کا اس نے اسے حکم دیا ہے اور ان تمام امور میں جن سے اسے منع کیا ہے، تو اس نے اللہ تعالیٰ کی عبادت کو کامل کر دیا۔ اور جو شخص اپنے دین اور اپنے عمل میں شیطان کی اطاعت کرے، تو اس نے شیطان کی عبادت کی۔

کیا آپ نے نہیں دیکھا کہ اللہ تعالیٰ نے ان لوگوں سے فرمایا جنہوں نے کوتاہی کی:

أَلَمْ أَعْهَدْ إِلَيْكُمْ يَبَنِي ءَادَمَ أَن لَّا تَعْبُدُوا الشَّيْطَانَ ﴿سورۃ يس: 60﴾

’’اے اولادِ آدم! کیا میں نے تمہیں تاکید نہیں کی تھی کہ شیطان کی عبادت نہ کرنا؟‘‘

اور ان کی شیطان کی عبادت اس وجہ سے تھی کہ انہوں نے اپنے دین کے معاملے میں اس کی اطاعت کی۔ چنانچہ ان میں سے بعض کو اس نے حکم دیا تو انہوں نے بتوں، یا سورج، یا چاند، یا انسان، یا کسی فرشتے کو اللہ کے سوا معبود بنا لیا اور اس کے سامنے سجدہ کرنے لگے۔ حالانکہ شیطان ان میں سے کسی کے سامنے ظاہر ہو کر یہ نہیں آیا تھا کہ وہ اس کی عبادت کریں یا اسے سجدہ کریں، بلکہ انہوں نے اس کی اطاعت کی اور ان چیزوں کو اللہ کے سوا معبود بنا لیا۔

پھر جب قیامت کے دن سب کو جہنم میں جمع کیا جائے گا تو شیطان ان سے کہے گا:

إِنِّي كَفَرْتُ بِمَا أَشْرَكْتُمُونِ مِن قَبْلُ﴿سورۃ إبراهيم: 22﴾

’’میں تمہارے اس شرک سے بری ہوں جو تم نے پہلے میرے ساتھ کیا تھا۔‘‘

اور اللہ تعالیٰ نے فرمایا:

إِنَّكُمْ وَمَا تَعْبُدُونَ مِن دُونِ اللهِ حَصَبُ جَهَنَّمَ أَنتُمْ لَهَا وَارِدُونَ ٩٨﴿ سورۃ الأنبياء: 98﴾

’’بے شک تم اور جنہیں تم اللہ کے سوا پوجتے ہو، سب جہنم کا ایندھن ہیں، تم سب اس میں داخل ہونے والے ہو۔‘‘

پس عیسیٰ علیہ السلام اور فرشتوں کی بھی اللہ کے سوا عبادت کی گئی، لیکن اللہ تعالیٰ نے انہیں جہنم میں نہیں ڈالا۔ اسی طرح سورج اور چاند کا بھی کوئی گناہ نہیں، البتہ ان کی عبادت کرنے والوں کا معاملہ شیطان کی اطاعت کی طرف لوٹتا ہے، چنانچہ انہیں بھی ان کے ساتھ جہنم میں رکھا جائے گا۔

یہی بات اللہ تعالیٰ کے اس فرمان میں بیان ہوئی ہے، جب وہ لوگ قیامت کے دن ان معبودوں کے سامنے حاضر ہوں گے:

تَاللهِ إِن كُنَّا لَفِي ضَلَالٍ مُّبِينٍ ٩٧ إِذْ نُسَوِّيكُم بِرَبِّ الْعَلَمِينَ﴿سورۃالشعراء: 97 – 98﴾

’’اللہ کی قسم! ہم تو کھلی گمراہی میں تھے، جب ہم تمہیں تمام جہانوں کے رب کے برابر ٹھہراتے تھے۔‘‘

اور جب اللہ تعالیٰ فرشتوں سے پوچھے گا:

أَهَؤُلَاءِ إِيَّاكُمْ كَانُوا يَعْبُدُونَ

’’کیا یہ لوگ تم ہی کی عبادت کیا کرتے تھے؟‘‘

تو فرشتے کہیں گے:

قَالُوا سُبْحَانَكَ أَنْتَ وَلِيُّنَا مِنْ دُونِهِمْ بَلْ كَانُوا يَعْبُدُونَ الْجِنَّ أَكْثَرُهُمْ بِهِمْ مُؤْمِنُونَ ٤١﴿سورۃسبأ: 40 – 41﴾

’’انہوں نے کہا: تو پاک ہے! تو ہی ہمارا کارساز ہے، نہ کہ یہ لوگ۔ بلکہ یہ جنات کی عبادت کرتے تھے، ان میں سے اکثر انہی پر ایمان رکھنے والے تھے۔‘‘

انہوں نے کہا: کیا تم دیکھتے نہیں کہ ان کی جنات کی عبادت درحقیقت اس بات کی وجہ سے تھی کہ انہوں نے غیر اللہ کی عبادت کے معاملے میں شیطان کی اطاعت کی؟ پس عبادت کا مفہوم بالآخر اطاعت ہی کی طرف لوٹتا ہے۔

5 – اور آپ نے اسلام کے بارے میں پوچھا؟

اسلام سے مراد اخلاص ہے۔ اللہ تبارک و تعالیٰ نے سیدنا ابراہیم علیہ السلام سے فرمایا: أَسْلِمْ ﴿سورۃالبقرة: 131﴾یعنی اپنے دین کو خالص کرو۔

اور فرمایا: مَنْ أَسْلَمَ وَجْهَهُ لِلّٰهِ﴿ سورۃالبقرة: 112﴾یعنی جس نے اپنا دین اللہ کے لیے خالص کر لیا۔

6 – اور آپ نے اخلاص کے بارے میں پوچھا؟

اخلاص یہ ہے کہ بندہ اپنے دین اور اپنے عمل کو اللہ ہی کے لیے خالص کر دے، چنانچہ وہ اپنے عمل کے ذریعے کسی کے لیے ریاکاری نہ کرے، اور یہ اخلاص تمام حق کے راستے میں ہو؛ پس یہی اخلاص ہے۔

اور جیسا کہ ابن بطہ رحمہ اللہ نے اپنے عقیدے میں فرمایا: اللہ عزوجل پر ایمان کا معنی یہ ہے کہ بندہ ان تمام باتوں کی تصدیق کرے جو اللہ تعالیٰ نے فرمائی ہیں، جن کا حکم دیا ہے، جنہیں فرض قرار دیا ہے اور جن سے منع فرمایا ہے، یعنی ان تمام امور کی جو رسولوں کے ذریعے اس کی جانب سے آئے اور جن کے بارے میں کتابیں نازل کی گئیں۔ اور ان تمام باتوں کی تصدیق کا مطلب یہ ہے کہ زبان سے اقرار ہو، دل سے تصدیق ہو اور اعضاء سے عمل ہو۔ 

میں کہتا ہوں: سلف کے نزدیک کوئی شخص اس وقت تک مؤمن، تصدیق کرنے والا اور اپنے ایمان میں سچا نہیں ہو سکتا جب تک اس کے اندر ایمان کے تینوں ارکان جمع نہ ہوں: دل کی تصدیق، زبان کا قول اور اعضاء و جوارح کا عمل۔ اور اگر ان میں سے کوئی ایک بھی مفقود ہو جائے تو وہ ہرگز مؤمن نہیں ہو سکتا، برخلاف مرجئہ کے۔

اور میں نے اس مسئلے کی وضاحت اپنی کتاب   الابانۃ الصغرى پر اپنے تعلیق میں تفصیل سے بیان کی ہے۔﴿ص 145، طبعہ: 3﴾