عقائد کے ان رسائل کو جمع کرنے کے لیے  علماءنے  حتی المقدور وسیع تحقیق سے کام لیا، جس کے نتیجے میں سلف صالحین اور ائمۂ اہلِ سنت کے عقیدے پر مشتمل رسائل کی ایک بڑی تعداد تک رسائی حاصل ہوئی۔ ان میں بعض رسائل عقیدے کے کسی ایک مخصوص مسئلے، جیسے ایمان، تقدیر یا قرآن کے مسئلے، پر مشتمل تھے، جبکہ بعض میں سنت اور عقیدے کے متعدد بنیادی ابواب کو جامع انداز میں بیان کیا گیا تھا۔

ان تمام رسائل میں سے میں نے انہی متون کا انتخاب کیا ہے جو سلف صالحین کے خالص منہج کی صحیح ترجمانی کرتے ہیں، جن میں عقیدہ پوری وضاحت کے ساتھ بیان کیا گیا ہے، اور جو بعد کے ادوار میں پیدا ہونے والی بدعات، غیر ثابت اصطلاحات، فلسفیانہ تعبیرات اور اہلِ بدعت کی داخل کردہ باتوں سے محفوظ ہیں۔

اسی حقیقت کی طرف اشارہ کرتے ہوئے شیخ الاسلام ابن تیمیہ رحمہ اللہ فرماتے ہیں کہ:

 اہلِ سنت والجماعت کے عقیدے پر مختصر رسائل لکھنے والے ائمہ کا طریقہ یہ تھا کہ وہ ان بنیادی عقائد کو بیان کرتے تھے جن کے ذریعے اہلِ سنت اپنے زمانے کے اہلِ بدعت اور گمراہ فرقوں سے ممتاز ہوتے ہیں۔ چنانچہ وہ اللہ تعالیٰ کے اسماء و صفات کے اثبات، قرآنِ کریم کے غیر مخلوق ہونے، آخرت میں مومنوں کے لیے اللہ تعالیٰ کے دیدار، تقدیر، ایمان، اسماء و احکام، وعد و وعید، گناہِ کبیرہ کے مرتکب کے حکم، خلفائے راشدین کے فضائل اور امامت، اور دیگر بنیادی عقائد کو واضح کرتے تھے۔ ان تمام مسائل میں وہ ہمیشہ کتاب و سنت اور سلف صالحین کے فہم کو بنیاد بناتے اور اہلِ بدعت کی گمراہ آراء کا رد کرتے تھے۔

﴿العقيدة الاصفهانيہ : 31﴾

اسی وجہ سے سلف کے یہ مختصر رسائل محض عقائد کا مجموعہ نہیں، بلکہ اہلِ سنت والجماعت کے امتیازی منہج کی واضح ترجمانی بھی ہیں، اور ہر دور میں حق و باطل کے درمیان فرق واضح کرنے کا ذریعہ رہے ہیں۔

یہ مختصر عقائد اس حقیقت کو نمایاں کرتے ہیں کہ عقیدے کے بنیادی مسائل اپنی اصل میں نہایت واضح، آسان اور فطری ہیں۔ ان رسائل کے مصنفین علم و عمل میں امت کے وہ ائمہ تھے جنہوں نے دین کو براہِ راست کتاب و سنت اور سلف صالحین کے فہم سے اخذ کیا۔ وہ بے جا تکلف، فلسفیانہ موشگافیوں اور علمِ کلام کی پیچیدگیوں سے دور رہے، اسی لیے ان کے عقائد نہایت صاف، سادہ اور دلائلِ شرعیہ پر قائم نظر آتے ہیں۔ انہوں نے دین میں کوئی نئی بات ایجاد نہیں کی، بلکہ وہی عقیدہ بیان کیا جو رسول اللہ ﷺ، صحابۂ کرام، تابعین اور ائمۂ سلف سے ثابت ہے۔ یہی وجہ ہے کہ ان رسائل میں بدعت، فلسفے اور اہلِ کلام کی خود ساختہ اصطلاحات کی آمیزش نہیں ملتی، بلکہ ہر مسئلہ نہایت اختصار، وضاحت اور اعتدال کے ساتھ پیش کیا گیا ہے۔

ان رسائل کی ایک نمایاں خصوصیت یہ بھی ہے کہ اختصار کے باوجود ان میں علم کی گہرائی، استدلال کی مضبوطی اور بیان کی جامعیت بدرجۂ اتم موجود ہے۔ سلف صالحین کا یہی امتیاز تھا کہ وہ کم الفاظ میں بڑے معانی ادا کرتے تھے اور غیر ضروری بحث و جدال سے اجتناب کرتے تھے۔ ائمۂ سلف کا مختصر کلام اپنے اندر وہ جامعیت، بصیرت اور علمی پختگی رکھتا ہے جس سے بعد کے لوگوں کی طویل اور پیچیدہ مباحث اکثر خالی نظر آتی ہیں۔ خاموشی علم کی کمی نہیں بلکہ علم، تقویٰ اور خشیتِ الٰہی کی علامت تھی، جبکہ بے فائدہ مناظروں، طویل مباحث اور ضرورت سے زیادہ گفتگونے اس امت کو اختلاف، تفرقہ اور فکری انتشارمیں ہی ڈالا ہے۔ اسی لیے سلف کا منہج ہمیشہ جامع، آسان، متوازن اور کتاب و سنت کے قریب ترین رہا، اور یہی وہ راستہ ہے جو ہر طالبِ علم کو اعتدال، بصیرت اور حق کی طرف رہنمائی فراہم کرتا ہے۔

ہم اللہ تعالیٰ سے دعا کرتے ہیں کہ وہ ہمیں بھی اہلِ سنت، اہلِ حدیث اور اہلِ اثر میں شامل فرمائے، ہمیں ان کے عقیدے اور منہج پر ثابت قدم رکھے، اور سلف صالحین کے نقشِ قدم پر چلنے کی توفیق عطا فرمائے۔آمین۔