کیا آپ اس بات پر یقین کریں گے کہ مسلم معاشرے میں بے حیائی کو فروغ دینے کی کوشش ایک منصوبہ بندی کے تحت ہوتی ہے؟

شاید کوئی یہ کہے کہ کچھ لوگ ہر بات میں سازش کی تھیوری تلاش کرتے ہیں لیکن مسئلہ اتنا سادہ نہیں۔ امتِ مسلمہ کے دشمن صدیوں سے اس کوشش میں ہیں کہ مسلمان کبھی دنیا پر حکمرانی نہ کر سکیں۔ ان کے تھنک ٹینک، ان کے دانش ور، ان کے علماء بے حد سنجیدگی سے اس باب میں کوشش کرتے ہیں کہ مسلم معاشرے اخلاقی طور سے کھوکھلے ہوں۔ اس مقصد کے لیے وہ خاموشی سے، پوشیدہ طریقے سے مصروفِ کار رہتے ہیں۔

اب سوشل اور الیکٹرانک میڈیا کا دور ہے۔ لمحے بھر میں آپ دنیا کے کسی دور دراز کونے میں ہونے والے واقعے سے نہ صرف آگاہ ہو جاتے ہیں، بلکہ آپ براہِ راست وہ مناظر اپنے موبائل اور کمپیوٹر پر دیکھ رہے ہوتے ہیں (کیونکہ TV تو یوں سمجھیے قصہِ ماضی ہو چکا ہے) اس دور میں امت کے دشمنوں نے باقاعدہ منصوبہ بندی کے تحت مسلم معاشرے اور مسلمان نوجوان لڑکوں اور لڑکیوں کو ہدف بنایا ہوا ہے۔ مغربی اقدار بہت ہی شوگر کوٹڈ (Sugar Coated) کر کے پیش کی جاتی ہیں۔ مغرب کی ثقافتی برتری کے جھنڈے گاڑے جا رہے ہیں۔ وہ لوگ اپنی پلاننگ کے ساتھ ہمارے گھروں بلکہ ہمارے بیڈ رومز تک آ چکے ہیں اور ہم ہیں کہ عالی شان سماجی روایات کے حامل اپنے دینِ اسلام کی ثقافتی تعلیمات سے بالکل نابلد ہیں اور جنہیں کچھ علم ہے، ان میں سے بھی کتنے ہی ہیں کہ معذرت خواہانہ سوچ اپنائے ہوئے ہیں۔

اسلام کے بدخواہوں کی سوچ ہے کہ مسلمانوں کو ان کی اخلاقی اقدار سے دور کر دیا جائے۔ اس میں انہوں نے لباس اور فیشن کا خاص طور سے انتخاب کیا ہوا ہے۔ لباس میں وہ وہ ڈیزائن آ رہے ہیں کہ اللہ کی پناہ۔ باریک سے باریک لباس کہ صاف چھپتے بھی نہیں، سامنے آتے بھی نہیں کا منظر ہوتا ہے۔ کسی بھی بیدار مغز سے حالات کی یہ سنگینی پوشیدہ نہیں۔ ہماری فیشن انڈسٹری جہالت کا ملغوبہ ہے۔ ان کو علم ہی نہیں کہ ساڑھے چودہ سو سال پہلے ان کے مہربان رب نے رسول کریم صلی اللہ علیہ وسلم کے ذریعے لباس کے احکامات مومنین ومومنات کے لیے نازل کر دیے تھے۔ اب مغرب کے جاہلوں کی پیروی میں یہ لوگ ان پاکیزہ احکامات سے منہ موڑے ہوئے ہیں۔ ہماری فیکٹریاں جن میں کپڑا بنتا ہے، ان کے مالکان بھی مسلمان ہیں۔ کیا انہیں علم نہیں کہ اس طرح کے باریک لباس تیار کرنا کسی طرح درست نہیں۔

معاشرے میں بے حیائی کو فروغ دینے والی صرف طوائفیں ہی تو نہیں۔ یہ میک اپ آرٹسٹ، یہ گلوکار، یہ شوبز کے فنکار، یہ فیشن ڈیزائنر اور یہ باریک کپڑے تیار کرنے والے مل مالکان بھی اس گناہ میں شریک ہیں اور شاید ایک سے بڑھ کر ایک ہو۔ بات کچھ طویل ہو گئی۔ بہر حال ہر وہ شخص جس کو اللہ نے سوچنے کے لیے دماغ دیا ہے اور دیکھنے کے لیے آنکھیں، تو وہ ضرور حالات کی اس سنگینی کا نہ صرف ادراک کرے بلکہ اس طوفانِ بد تمیزی بلکہ بے حیائی کے اس سیلاب کے سامنے بند باندھنے کی اپنی سی کوشش ضرور کرے۔ کوشش کرنا ہمارا فرض ہے اگرچہ نتیجہ تو ہمارے ہاتھ میں نہ ہو۔

اب آئیے اس مسئلے پر جس کا ذکر کرنا چاہتا ہوں۔

نماز میں عورت ہو یا مرد، اس کے لیے باریک کپڑے میں نماز پڑھنا کسی طور جائز نہیں۔ مردوں کا ستر ناف سے لے کر گھٹنوں تک ہے۔ ان کی قمیص جیسی بھی باریک ہو، کوئی مسئلہ نہیں۔ البتہ شلوار قمیص کی طرح باریک نہیں ہونی چاہیے۔ اصل مسئلہ خواتین کا ہے، مردوں کا نہیں۔ ایسا لباس جس میں جسم نظر آتا ہو، بدن کے نشیب و فراز نمایاں ہوتے ہوں، اس میں عورتوں کی نماز نہیں ہوتی۔

کیا حاصل اس نماز سے کہ خاتونِ خانہ نے اپنی مصروفیات سے وقت نکالا، وضو کیا، نماز پڑھی اور اللہ کے ہاں وہ نماز ردی کی ٹوکری میں پھینک دی گئی۔ وجہ؟ وجہ یہ کہ اس معزز محترم خاتون نے ان قواعد و ضوابط کا خیال نہیں رکھا جو اللہ تعالیٰ نے مقرر فرمائے ہیں۔

اس لیے اے میری محترم بہن! آپ اس مسئلے کی سنگینی پر غور فرمائیے۔ آپ کا باریک لباس جو بظاہر بہت پرکشش اور خوش نما نظر آتا ہے، وہ آپ کے لیے کتنی بڑی مصیبت اور کتنا بڑا وبال ہے۔ آپ کو کیوں اس کا اندازہ نہیں؟ آپ تو وہ ہیں کہ ذہین وفطین مردوں کو اپنی انگلیوں پر نچالیتی ہیں، سارے سسرال والوں سے ایک نحیف و ناتواں بہو ٹکر لے لیتی ہے، مگر اپنے ہی ہاتھوں اپنا اتنا بڑا نقصان اور پھر بھی اس کا احساس نہیں۔۔۔۔۔۔؟

لباس کا مقصد ستر پوشی ہے، ستر کا اظہار نہیں۔ اللہ رب العزت کی بارگاہ میں حاضری کے کچھ آداب ہیں۔ خوب غور کیجیے اور سوچیے کہ اسلام کے دشمن جو ہمارے پیارے نبی ﷺکے دشمن ہیں، وہ آپ کو اپنا ہدف بنائے ہوئے ہیں اور آپ ہیں کہ ان کے لیے تر نوالہ بن رہی ہیں۔