جب فدک پر مضمون شروع کیا تو گمان بھی نہ تھا کہ یوں طویل تر ہو جائے گا –

وہ بد خو اور میری داستان عشق طولانی

عبارت مختصر ، قاصد بھی گھبرا جائے ہے مجھ سے

اور جب اس موضوع پر پڑھنا شروع کیا تو “احباب ستم گر ” اعتراضات کے پہاڑ بنائے بیٹھے محسوس ہوے – سو پہلے حصے میں ہم نے اجمالی بحث کی اور یہاں ہم ممکن حد تک اعتراضات کا جواب دیں گے –

پہلا اعتراض ان لوگوں کا حدیث ” لا نورث ۔۔۔۔الخ ” پر ہوتا ہے ۔

عن أبي بکر الصدیق عن النبي ﷺ قال: «لا نورث ما ترکناه صدقة»

’’حضرت ابوبکر صدیق رسول اللہ ﷺ سے روایت کرتے ہیں ،آپﷺ نے فرمایا: ہمارا کوئی وارث نہیں ہوتا۔ ہم جو کچھ چھوڑتے ہیں ،وہ صدقہ ہوتاہے۔‘‘

جب سیدہ فاطمہ ، سیدنا ابوبکر کے پاس “پہنچیں ” اور دعوی وراثت کیا تو جواب میں انہوں نے نبی کریم ﷺ کی ایک حدیث سنا کے ان کے دعوے وراثت کو رد کر دیا – اس حدیث پر بہت اعتراض کیا جاتا ہے – ایک یہ کہ حدیث انہوں نے [ معاذ اللہ ] اپنے پاس سے گھڑ لی تھی ، اگر ایسا ہوتا تو کوئی اور صحابی  اسے بیان کیوں نہیں کرتا – دوسرا اعتراض یہ حدیث قران کے خلاف ہے ، جہاں تک پہلے اعتراض کا تعلق  ہے تو معمول کی کم علمی پر مبنی ہے – یہ حدیث بایں الفاظ و دیگر مگر اسی مفھوم میں شیعہ سنی دونوں کی کتب میں موجود ہے اور اس قدر موجود ہے کہ اسے متواتر کہا جائے تو مبالغہ نہ ہو گا -اس حدیث کو  ایک سے زیادہ صحابہ نے روایت کیا اور  کتب احادیث میں موجود بھی ہے – سیدنا ابوبکر کے بارے میں یہ بات معروف ہے کہ آپ اپنے مزاج کے سبب حدیث کے بیان میں بہت محتاط تھے ، اب اگر ان جیسا بندہ یہ حدیث بیان کر رہا ہے تو ان کا اس میں اکیلا ہونا بھی کافی تھا ، لیکن

حفیظ اہل زبان کب مانتے  تھے

بڑے زوروں سے منوایا گیا ہوں

سو نہ ماننے والوں کے لیے اللہ نے بہت سا سامان کر رکھا تھا ، اس روایت کو سیدہ عائشہ نے سیدنا ابو ہریرہ نے اور سیدنا عمر نے بھی روایت کیا ہے – اور جب سیدنا عمر کے دور میں یہ معامله دوبارہ سامنے آیا تو سیدنا عمر نے مجلس میں  موجود  لیکن ان سبب سے اہم بات یہ ہے کہ خود شیعہ کتب میں بھی یہ روایت مفھوم کے اعتبار سے  محفوظ ہے –

معروف شیعہ محدث محمد بن یعقوب کلینی نے اپنی کتاب اصول کافی میں بروایت ابوالبختری امام ابوعبداللہ جعفر صادق سے اس معنی کی روایت نقل کی ہے:

«عن ابی عبداللہ قال ان العلماء ورثة الأنبیاء و ذالک ان الانبیاء۔۔۔۔۔۔ دراھما ولا دینارا وانما ورثوا احادیث من احادیثھم فمن اخذ بیشئ منھا اخذ بحظ وافر» 

﴿اصول کافی:32/1 باب صفۃ العلم وفضلہ﴾

حضرت جعفر صادق نے فرمایا: ہر گاہ علماء انبیاء علیہم السلام کے وارث ہیں اس لیےکہ انبیاء علیہم السلام کی وراثت درہم و دینار کی صورت میں نہیں ہوتی وہ اپنی حدیثیں وراثت میں چھوڑتے ہیں جو انہیں لے لیتا ہے اس نے پورا حصہ پالیا۔‘‘

اصول کافی میں کلینی نےحماد بن عیسی سےاور حماد بن عیسی نےقداح سےجعفر ابو عبداللہ کی روایت نقل کرتے ہوئے کہا ہے کہ رسول اللہ صلی اللہ علیہ وسلم نے فرمایا ’’جو علم کو تلاش کرتے ہوئے علم کے راستے پر چلے، اللہ اسے جنت کے راستے پر چلا دیتا ہے… اور عالم کی فضیلت عبادت گزار پر ایسی ہے، جیسے چودھویں کا چاند سارے ستاروں سے افضل ہے۔ علماء انبیاء علیہم السلام کے وارث ہیں جو دینار و درہم وراثت میں نہیں چھوڑتے لیکن علم کی میراث چھوڑتے ہیں، جو اس میں سے کچھ حاصل کرلے اس نے بہت کچھ حاصل کرلیا۔‘‘

﴿الاصول من الکافی کتاب فضل العلم، باب ثواب العالم والمتعلم جلد 1، 34﴾

جعفر ابوعبداللہ نےایسی ہی ایک اور روایت میں کہا ہے: ’’علماء انبیاء علیہم السلام کے وارث ہیں اور ان کا مالِ میراث درہم و دینار نہیں ہوتا، انہیں انبیاء علیہم السلام کی احادیث میراث میں ملتی ہیں۔‘‘

﴿الاصول من الکافی باب صفۃ العلم وفضلہ وفضل العلماء جلد 1، صفحہ 32﴾

’’ابراہیم بن علی رافعی نے اپنے باپ سے، اس نے اپنی دادی بنت ابی رافع سے روایت کیا ہے وہ کہتی ہیں، رسول اللہ صلی اللہ علیہ وسلم کے مرضِ وفات میں فاطمہ رضی اللہ عنہا بنتِ رسول اللہ  ﷺ اپنے دونوں بیٹوں حسن اور حسین رضی اللہ عنہما کو لے کر آپ ﷺ کے پاس آئیں اور کہنے لگیں”یا رسول اللہ ﷺ یہ دونوں آپ کے بیٹے ہیں، ان کو اپنی کچھ میراث دے دیجیے“، رسول اللہ  ﷺ نے فرمایا:’’ حسن رضی اللہ عنہ کے لیے میری ہیبت اور بزرگی ہے اور حسین رضی اللہ عنہ کے لیے میری جرأت اور میری سخاوت۔‘‘

﴿کتاب الخصال از قمی صدوق، صفحہ 77﴾

دوسری روایت میں ہے: ’’سیدہ فاطمہ رضی اللہ عنہا نے کہا یا رسول , یہ آپ کے دو بیٹے ہیں، انہیں کچھ عطا کیجیے۔ رسول اللہ ﷺ نے فرمایا: ’’حسن کو میں نے اپنا رعب اور بزرگی دی اور حسین کو اپنی سخاوت اور شجاعت۔‘‘

﴿کتاب الخصال از قمی صفحہ 77﴾

۔۔۔حدیث «مَا ترکنَا صَدقة» کی صحت اتنی عالم آشکارا ہے کہ شیخ ابوریہ محمود اور سید محمد باقر موسوی خراسانی جیسے کٹر شیعہ عالم بھی اس کو صحیح تسلیم کرتے ہیں۔

تیسری صدی کے مشہور شیعی محدث فرات بن ابراہیم ابن الفرات الکوفی اپنی تفسیر ’الفرات‘ میں روایت کرتے ہیں کہ ایک دفعہ حضرت علیؓ نے رسول اللہ  سے پوچھا: ما أرث منك یارسول اللهﷺ! یارسول اللہ ! میں آپ کی وراثت میں کیا پاؤں گا؟ تو آپ  نے میرے جواب میں فرمایا:

فقال: «مَا ورِث الأنبیاء من قبلي…»

’’جو کچھ مجھ سے پہلے انبیاء اپنی وراثت میں دیتے رہے ہیں، وہی آپ بھی حاصل کریں گے۔‘‘

حضرت علی رضی اللہ عنہ نے پھر سوال کیا:

ما ورثت الأنبیاء من قبلك؟

’’آپ سے پہلے کے انبیائے کرام اپنی وراثت میں کیا چھوڑتے رہے؟‘‘

اس پر رسو ل اللہ ﷺ نے فرمایا:

کتاب ربهم وسنہہ نبیهم ’’اپنے ربّ کی کتاب اور نبی کی سنت ‘‘ 

﴿ کتاب تفسیر فرات :ص82 بحوالہ تحفہ الشیعہ ﴾

یہ روایت ان لوگوں کے اس اشکال کو بھی دور کرتی ہے کہ جن کا مسلسل دعوی ہے کہ یہ حدیث قران کے خلاف ہے کہ جس میں انبیاء کا وراثت کا ذکر کیا گیا ہے –

آپ نے دیکھ لیا کہ خود ہمارے “دوستوں ” کی کتب اس روایت سے رونق  افروز ہیں لیکن الزام سیدنا صدیق اکبر پر کہ انہوں نے یہ روایت موقع پر گھڑ لی تھی –

۔۔۔۔

* شیعہ کتب کے حوالے کتاب و سنت ویب سائٹ سے لیے گیے ۔۔