شیعہ عموماً فدک کے واقعہ کو سیدنا ابوبکر صدیق رضی اللہ عنہ اور سیدہ فاطمہ رضی اللہ عنہا کے درمیان نزاع اور بے ادبی کے طور پر پیش کرتے ہیں، حالانکہ خود شیعہ مصادر اس کے برعکس تصویر پیش کرتے ہیں۔ذیل میں شیعہ کتاب “الاحتجاج للطبرسی” سے سیدنا ابوبکر رضی اللہ عنہ کا وہ جواب ملاحظہ فرمائیں جس سے اہلِ بیتِ نبوت رضی اللہ عنھم کے ساتھ ان کے ادب، احترام اور حسنِ عقیدت کا واضح ثبوت ملتا ہے:

ابوبکر نے کہا: اے بنتِ رسول! آپ کے بابا مومنین کیلئے مہربان و کریم اور خیر خواہ تھے، کافرین کے مقابل سخت و شدید اور عذاب کی طرح دکھائی پڑتے تھے، آپ کے والد اور علی ابن ابی طالب آپ کے شوہر ہیں، آپ اہل بیتِ رسول اور ان کے اہل خاندان سے ہیں، آپ لوگ دوسرے افراد میں منتخب ہیں، آپ کو دوست نہیں رکھے گا مگر وہ شخص جو کہ سعادت مند ہے اور دشمن نہیں رکھے گا مگر وہ شخص جو کہ شقی بد بخت ہے، آپ لوگ ہماری سعادت و خوش نصیبی کا وسیلہ ہیں۔

اے خاتم الانبیاء کی بہترین بیٹی اے سردار خواتین! آپ اپنی باتوں میں سچی اور عقل و خرد اور کمال کے لحاظ سے بالاتر ہیں کسی کو حق نہیں کہ آپ کے قول کو رد کرے اور آپ کے حق کو لے لے، لیکن بخدا قسم! میں نے رسولِ خدا کی رائے سے تجاوز نہیں کیا ہے اور نہ ہی ان کے قول کے خلاف عمل کیا ہے۔

ہاں! جو شخص کسی قوم وملت کیطرف سے تحقیق کیلئے بھیجا جاتا ہے وہ اپنی قوم سے جھوٹ نہیں بولتا، میں خدا کو گواہ بناتا ہوں کہ میں نے رسولِ خدا کو فرماتے سنا ہے:

“ہم گروہِ انبیاء سونا، چاندی، زمین و مال میراث نہیں چھوڑتے ہماری میراث علم و حکمت اور کتاب و نبوت ہے اور جو کچھ مال دنیا سے باقی رہ جائے وہ اس کے اختیار میں ہے جو کہ ہماری وفات کے بعد امورِ عامہ کی ولایت و حکومت کا مالک ہو وہ جیسی صلاح دیکھے اسے صرف کرے۔آپ جو مطالبہ کر رہی ہیں، میں اسے جنگ کے اسلحے، اس کے وسائل و اسباب اور چوپایوں پر خرچ کروں گا تاکہ مسلمان قدرت مند، مضبوط ہوں اور کفار و مخالفین سے جنگ و جہاد کے وقت غالب رہیں۔

یہ صرف میرا خیال اور میری بات نہیں ہے بلکہ تمام مسلمانوں کی رائے اور امت کا اجماع ہے، ہم ہرگز ہرگز کوئی مقصد و مطلب آپ سے پوشیدہ نہیں رکھنا چاہتے یا کوئی چیز آپ سے چھپانا نہیں چاہتے۔ جو کچھ میرے پاس ہے وہ میں آپ کو دیتا ہوں، میں اپنی طرف سے کوئی سختی و دشمنی نہیں کروں گا، آپ اپنے پدرِ بزرگوار کی امت کی سردار ہیں۔

پیغمبرِ اسلام کے فرزندوں کی مادرِ گرامی ہیں، ہم آپ کے مال کو آپ سے نہیں لینا چاہتے، باپ اور بیٹوں کے اعتبار سے آپ کی منزلت و عزت کا انکار بھی نہیں کر سکتے، جو کچھ میرے ہاتھوں میں ہے اس میں آپ کا امر اور حکم نافذ ہوگا لیکن کیا میں آپ کے بابا کے قول کی مخالفت کر سکتا ہوں؟

﴿احتجاج طبرسي:189،188/1﴾

ہمیں محمد بن عوف الطائی نے حدیث بیان کی، انہوں نے کہا: ہمیں عثمان بن سعید بن کثیر بن دینار، ابو الیمان اور بشر بن شعیب نے حدیث بیان کی، ان سب نے کہا: ہمیں شعیب بن ابی حمزہ نے زہری سے حدیث بیان کی، انہوں نے کہا: ہمیں عروہ بن زبیر نے حدیث بیان کی کہ (ام المومنین) سیدہ عائشہ رضی اللہ عنہا نے انہیں بتایا:

رسول اللہ ﷺ کی صاحبزادی سیدہ فاطمہ رضی اللہ عنہا نے سیدنا ابو بکر رضی اللہ عنہ کے پاس (آدمی) بھیجا تاکہ ان سے رسول اللہ ﷺ کی اس میراث کا تقاضا کریں جو اللہ تعالیٰ نے رسول اللہ ﷺ کو مالِ فئے (بغیر جنگ کے حاصل ہونے والا مال) میں سے عطا فرمایا تھا۔ اور سیدہ فاطمہ رضی اللہ عنہا اس وقت نبی کریم ﷺ کے اس صدقے (مال) کا مطالبہ کر رہی تھیں جو مدینہ اور فدک میں تھا اور جو خیبر کے خمس (پانچویں حصے) میں سے باقی بچا تھا۔

تو سیدہ عائشہ رضی اللہ عنہا نے بیان کیا کہ سیدنا ابو بکر رضی اللہ عنہ نے (جواب میں) کہا کہ رسول اللہ ﷺ نے فرمایا تھا: “ہمارا (انبیاء کا) کوئی وارث نہیں ہوتا، ہم جو کچھ چھوڑ جائیں وہ صدقہ ہوتا ہے۔ آلِ محمد (ﷺ) تو بس اسی مال میں سے کھا سکتی ہے— یعنی اللہ کے مال میں سے— انہیں اس سے زیادہ لینے کا حق نہیں ہے۔” اور اللہ کی قسم! میں رسول اللہ ﷺ کے صدقات (کے نظام) میں سے کسی چیز کو بھی اس کی اس حالت سے نہیں بدلوں گا جس پر وہ رسول اللہ ﷺ کے عہد مبارک میں تھی۔

اور میں اس (مال) میں یقیناً وہی طرزِ عمل اختیار کروں گا جو اس میں رسول اللہ ﷺ نے اختیار کیا تھا

﴿کِتَابُ المُنْتَقٰی: 408،407﴾